ဒေါက်တာ အရှင်နန္ဒမာလာ ဘိဝံသ |၂၀၁၅ ခုနှစ်၊ မတ်လ (၄) ရက်နေ့ တွင် တပည့် ဆရာလေး ဒေါက်တာ ယုဇနဥာဏီ ရေးသားပူဇော် ခဲ့သည့်ပါမောက္ခချုပ်ဆရာတော်ကြီး၏အတွေးအမြင်များ

လှုပ်ရှားမှု ပုံရိပ်များ

၂၀၁၅ ခုနှစ်၊ မတ်လ (၄) ရက်နေ့ တွင် တပည့် ဆရာလေး ဒေါက်တာ ယုဇနဥာဏီ ရေးသားပူဇော် ခဲ့သည့်ပါမောက္ခချုပ်ဆရာတော်ကြီး၏အတွေးအမြင်များ

၂၀၁၅ ခုနှစ်၊ မတ်လ (၄) ရက်နေ့ တွင် တပည့် ဆရာလေး ဒေါက်တာ ယုဇနဥာဏီ ရေးသားပူဇော် ခဲ့သည့်ပါမောက္ခချုပ်ဆရာတော်ကြီး၏အတွေးအမြင်များ စာစုကိုဖေါ်ပြအပ်ပါသည်။
(ဓမ္မသဘင်အဖွဲ့)
🏆 ယနေ့ မြန်မာသက္ကရာဇ် ၁၃၇၆ ခုနှစ်၊ တပေါင်းလပြည့်နေ့တွင်ကျရောက်သော ဆရာတော်ကြီး၏ သက်တော် (၇၅) နှစ်ပြည့် စိန်ရတု ဝိဇာတပူဇာအနေဖြင့် အနယ်နယ်အရပ်ရပ်မှတပည့်အပေါင်းမှ မိမိတို့စွမ်းအားရှိသည့်အတိုင်း ပူဇော်ကြသည်ကို ၀မ်းမြောက်ကြည်နူးဖွယ်တွေ့မြင်ကြရမည်ဖြစ်ပေသည်။ ကိုယ်တိုင်ကိုယ်ကျပါ၀င်ဆင်နွှဲ ကုသိုလ်ပြုခွင့်ရသူများ အနေဖြင့်ဆိုဖွယ်မရှိ။ အဝေးရောက်တပည့်များပင်ထိုပီတိတို့ကို မျှဝေခံစားနိုင်ကြသည်မဟုတ်ပါလော။
🏆 မိမိအနေဖြင့်လည်း ဆရာတော်ကြီး ကျန်းမာစွာဖြင့်သက်တော်ရာကျော် ရှည်ပါစေကြောင်းတောင်းဆုပြုရင်း ဆရာတော်၏ အတွေးအမြင် မိန့်ကြားချက်တို့ကိုပြန်ပြောင်းသတိရ ကြည်ညိုမိပါသည်။
🏆 “ဘုန်းဘုန်းက သူများလုပ်တဲ့အလုပ်ကိုမလုပ်ဘူး။ သူများမလုပ်တဲ့အလုပ်ကိုလုပ်တာ”ဟု မိန့်လေ့ရှိသည်။
🏆 မှန်ပါသည်။ ဆရာတော်သည် မိမိ မိန့်ကြားသည့်အတိုင်း လက်တွေ့ ကျင့်သုံးတော်မူသည်။ ဆရာတော်၏ ခံယူချက်သဘောထားတို့ကို စာချရာတွင်လည်းကောင်း၊ တရားဟောကြားရာတွင်လည်းကောင်း သတိပြုမိကြပေမည်။ ယခုခေတ်တွင် ပိဋကတ် စာပေကျွမ်းကျင်နှံံ့စပ်တော်မူကြသော ဓမ္မကထိက၊ ကမ္မဋ္ဌာန်းနည်းပြဆရာတော်များစွာရှိပေရာ မိမိစရိုက်နှင့်သင့်တော်ရာ တရားတော်တို့ကိုရွေးချယ်နာကြားနိုင်ကြပေသည်။
🏆 သို့သော် မိမိလက်လှမ်းမှီသရွေ့ ဆိုရပါမူ အဘိဓမ္မတရားတော်တို့ကို အများနားလည် သဘောပေါက်ပြီး လက်တွေ့ ဘ၀တွင်လိုက်နာကျင့်သုံးနိုင်ရန် ကျယ်ပြန့်စွာဟောကြားသည်မှာကား ဆရာတော်ပင်ဖြစ်မည်ဟုယူဆမိပါသည်။
🏆 ဆရာတော်သည် အဘိဓမ္မတရားတော်တို့ကို ဟောပြောပို့ချရာတွင် ကျမ်းအနှစ်ချုပ် (outline) ထုတ်ကာ ဟောလေ့ရှိသည်။ ဥပမာ – အဘိဓမ္မ (၇)ကျမ်းတွင် အဦးအစဖြစ်သော ဓမ္မသင်္ဂဏီ ကိုပို့ချရာတွင်လည်း ကျမ်းတစ်စောင်လုံးကိုဦးစွာခြုံငုံသုံးသပ်ပီးမှ အခန်းကဏ္ဍ
အလိုက်ပြန်လည်ရှင်းလင်းပို့ချတော်မူသည်။ ဆရာတော့်စကားဖြင့် ဆိုရပါမူ perspective ကိုမြင်အောင်ကြည့်ဖို့များစွာအရေးကြီးပေသည်။
🏆 ထိုကဲ့သို့ perspective ကိုမြင်အောင်ကြည့်နိုင်ဖို့ကား မိမိတို့လိုစာသင်သား တစ်ဦးအတွက်တော့ လွယ်ကူလှသည်မဟုတ်။ ထို့အတူပင်ဗုဒ္ဓဘာသာ၀င် သူတော်စင်တို့့နေ့စဉ်ရွတ်ပွါးလေ့ရှိသော ပရိတ်ကြီးတွင်ပါသော သုတ်တော်တို့ကို အနှစ်ချုပ် (summary) အမည်ပေးကာ ဟောကြားတော်မူသည်။ ဤသည်ကားမိမိ၏ကိုယ်ပိုင်အမြင်ဖြင့် သုတေသနပြုချက် (research) ဖြစ်ကြောင်း ဆရာတော်က မိန့်ကြားတော်မူသည်။
🏆 ဆရာတော်သည် ပိဋကတ်စာပေကျွမ်းကျင်နှံံ့စပ်ရုံသာမက ဘာသန္တရ၊
🏆 ဒေသန္တရ ဗဟုသုတလည်း များစွာပြည့်စုံပေရကား လိုအပ်သလို နှိုင်းယှဉ်ချက်များပြု၍လည်းကောင်း၊
🏆 ဥပမာ သာဓကများပေး၍လည်းကောင်း ယုတ္တိကျကျ ရှင်းလင်းအောင်ဟောကြားနိုင်သော တွေးခေါ်ကြံဆမှု ပညာ၊
🏆 တီထွင်ဖန်တီးနိုင်သော ဥာဏ် (creative thinking)နှင့်ပြည့်စုံသူဖြစ်သဖြင့် ပြည်တွင်းတွင်သာမက ပြည်ပမှပညာလိုလားသူ တပည့်အပေါင်း၏လေးစားကြည်ညိုမှုကို ခံယူရရှိတော်မူပေသည်။
🏆 “ပဋိစ္စသမုပ္ပါဒ်ကို ပဋ္ဌာန်းနည်းဖြင့်လေ့လာသုံးသပ်ခြင်း” ကဲ့သို့ တရားတော်များတွင် ဆရာတော်၏ ထိုအမြင်တို့ကောင်းစွာထင်ဟပ်နေပေသည်။
🏆 အဘိဓမ္မလေ့လာခြင်းမှရရှိသော အသိပညာကို
ဝိပဿနာအကျင့်တွင် လက်တွေ့ ကျင့်သုံးခြင်းကို အနောက်နိုင်ငံသားတို့အနေဖြင့်လွန်စွာတန်ဖိုးထား ရကား ထိုပရိတ်သတ်တို့အတွက် ဆရာတော်၏ ဓမ္မသဟာယ သာသနာ့စင်တာ တွင် Institute of Dhamma Education (IDE)
ကိုဖွင့်လှစ်လျက် နှစ်စဉ်သင်တန်းများ ပို့ချပေးလျက်ရှိရာ ပြည်တွင်းမှ တရားချစ်ခင်သူတော်စင် အပေါင်းတို့သာမက ပြည်ပမှ ဓမ္မမာမက အပေါင်းတို့လည်း တရားဆည်းပူးခွင့်ရရှိကြပြီဖြစ်သည်။
🏆 IDE သည်ကား ဆရာတော်၏ ဓမ္မစိတ်ကူးဥာဏ်ကွန့်မြူးသလောက် အကောင်အထည်ဖေါ်ဆောင်မည့်ကျောင်းတော်ပါပေတည်း။
🏆 ပြည်တွင်းပြည်ပမှ ပညာရှင်များ၊ တပည့်များမှ ဝိုင်း၀န်းအားဖြည့်ပံ့ပိုးလျက်ရှိကြောင်းဆရာတော်မှ အမိန့်ရှိသဖြင့်များစွာ၀မ်းမြောက်ကြရပါသည်။
🏆 ပိဋကတ်စာပေလောကတွင် ခက်ခဲနက်နဲလှသည့်ကျမ်းစာများဖြစ်သည့် ဝိသုဒ္ဓိမဂ်၊ ပဋ္ဌာန်းအရကောက်
အစရှိသောကျမ်းများနှင့် အခြားပိဋကတ်စာပေများ၊
တရားတော်များကို ရှင်းလင်းစွာ ဘာသာပြန်ဆိုမည့် ဆရာတော်၏ ရည်မှန်းချက်တို့ အောင်မြင်ပါစေကြောင်းနှင့် ဆရာတော် သက်တော်ရာကျော်ရှည်စွာဖြင့် သူတော်ကောင်းတရားတို့ကို ကမ္ဘာအနှံ့ဖြန့်ဝေနိုင်ပါစေကြောင်းတောင်းဆုပြုလျက် ဆရာတော်၏ ဥာဏ်တော်တို့ကိုဦးခိုက်ပူဇော်လိုက်ရပါသည်ဘုရား။ 🙏🏻
အစဉ်ရိုသေဂါရဖြင့်
တပည့်
ယုဇနဥာဏီ (ခတ်ေတ- ဒလေီ)
၂၀၁၅ ခုနှစ်၊ မတ်လ (၄) ရက်နေ့
(မှတ်ချက်။ ၂၀၀၈ ခုနှစ်၊ ဧပြီလ နှင့် မေလတို့တွင် ဂျာမနီနိုင်ငံ၊ နယ်သာလန်နိုင်ငံ၊ သြစတီးယားနိုင်ငံ၊ အင်္ဂလန်နိုင်ငံ တို့တွင် ဆရာတော် သင်တန်းပို့ချ၊သည့် မှတ်တမ်းဓါတ်ပုံအချို့ကို ကြည်ညိုနိုင်ပါရန် ပြန်လည်မျှဝေပါသည်။)